Denne oppskrifta har ein stor plass i hjartet mitt💛

Den vart nemleg utvikla under covid. Vi budde då i England og var i utgangspunktet bortskjemd med snack og sunne, varme lunsjar servert på skulen til gutane. Plutseleg stengde landet ned - lenge! Så når ungane endeleg skulle tilbake på skulen, og medbrakt snack var eit kriterium, var dette resultatet av ei letta og glad mor som hadde gått tom for kreativitet for lenge sidan på heimeskule-fronten.

Så enkelt!

Eg kunne sjølvsagt sendt med den gode, gamle nistepakka - skive med kvitost og eit eple. Men kor deilig hadde det ikkje vore å hatt noko som var heilt ferdig. Noko du kun måtte legge ned i ei matboks, og det var det.

Dette er vel den største årsaka til at vi (hald deg fast) fire år seinare framleis lagar desse bananbrøda som ungane vil ha med som snacks på skule og i barnehage.

Eg veit ikkje med deg, men vi er ein familie som sjeldan har meir tid enn vi treng om morgonen. Då er det luksus og ta éi skive, legge den i matboksa og så tiner den i løpet av eit par timar - akkurat i tide til snack-måtidet!

Bruk det du har

BANAN - Her har du ei gylden anledning til å redde stygge bananar på butikken eller på kjøkenbenken! Sjølv svarte bananar kan brukast - så lenge dei ikkje er mugla sjølvsagt.

GULROT - I tillegg til å vere ei fantastisk kjelde til vitamin A, er gulrot også med å gi sødme og fukt.

SQUASH - Denne frukta inneheld faktisk meir potassium enn bananer og gir ingen merkbar smak til brødet, berre meir næring.

MJØL - Visste du at spelt er opphavet til hvete slik vi kjenner det i dag? Eg er glad i speltmjøl då det har eit meir gunstig innhald av gluten (så ver litt obs på andre bakeeigenskapar i forhold til hvete), og kan opplevast litt snildare mot magen. I denne oppskrifta har eg også brukt havregryn, ei fantastisk kjelde til fiber, jern og vitaminer som B1 (tiamin) og B6 (pyridoksin).

VANILJEEKSTRAKT - Bruk den typen du har, om det er vaniljestang, vaniljesukker eller paste.

HONNING - Blir omtalt som “Ein viktig ingrediens i medisinen frå oldtida i Egypt” og “Naturens gull”. Nokre påstår det hjelp mot hoste og sår, men her trengst det meir forskning til.. Eg synes uansett det er nydeleg å kunne bruke NORSK gull - om det så berre er for søtning!

KANEL - Spice it up med litt god kanel, tilset gjerne meir om du vil. Sjølv om det berre er ei lita skei i dette tilfellet, er det ein god idé å finne ceylon kanel. Cassia kanel (den vanlegsate i matbutikken) inneheld stoffet kumarin som kan vere skadeleg å få i seg for mykje av.

EGG - Vel økologisk egg då desse er dei einaste som kan garantere at hønene har sett dagslys. God kjelde til protein og dei aller fleste vitaminane. Godt hevemiddel er det også.

SMØR - Ekte meierismør gjer underverk! Gir ein fantastisk smak og bidreg til å holde deg mett lenger.

SJOKOLADE - Dette er sjølvsagt heilt valgfritt, men veldig godt. Eg bruker 70% mørk sjokolade.

OPPSKRIFT BANANBRØD

Ingrediensar

• 5-6 bananar (ca 600 g utan skal)

• 4 egg

• 150 g honning

• 200 g smelta smør

• 700g mjøl, her 450 g speltmjøl og 250 g havregryn

• 3 ts vaniljeekstrakt

• 3 ts bakepulver

• 1 ts kanel

• 300 g finraspa grønsaker som t.d. gulrot og squash

• 100 g hakka sjokolade, type mørk

Korleis

1. Set omnen på 170 grader varmluft.

2. Finn fram to brødformer (eg bruker ca 10x20 cm, så mindre enn vanlege former men desto høgare brød - Ta det du har). Kle dei med bakepapir.

3. Rasp gulrøtter og squash. Trekk ut så mykje vatn du klarer med kjøkkenpapir.

4. Hakk opp sjokolade.

5. Mos bananane i ei kjøkkenmaskin og visp inn egg, smelta smør, vaniljeekstrakt og honning.

6. I ein annan bolle bland mjøl, bakepulver og kanel.

7. Tilsett det tørre oppi det våte og bland kun til alt er blanda.

8. Vend inn raspa grønsaker og sjokolade med ein slikkepott til slutt.

9. Fordel blandinga likt i dei to brødformene.

10. Steik lavt i ovnen i 45-60 minutt (avhengig av storleik på brødformene du bruker). Dekk over med aluminiumsfolie eller liknande dersom brøda blir litt godt steikt tidleg.

11. Ta dei ut av forma når dei er ferdig, og avkjøl heilt på rist før du skjerer opp i skiver og legg i luftette posar e.l. i frysaren.

Har du prøvd denne oppskrifta? Tag meg gjerne på sosiale medier så eg kan få sjå!